BUSINESS TIME

საინფორმაციო სააგენტო

კახეთში 120 ათას ტონამდე ყურძენია გადამუშავებული

კახეთში რთველი აქტიურ ფაზაშია, მოსავლის თითქმის 45% უკვე დაბინავებულია. 16 სექტემბრის მონაცემებით, კახეთში 120 ათას ტონამდე ყურძენია გადამუშავებული. გადამუშავებული ყურძნიდან 70 ათას ტონამდე რქაწითელია, 42 ათას ტონამდე საფერავი, 3 ათას ტონამდე კახური მწვანე და დანარჩენი სხვადასხვა ჯიშის ყურძენი.
 
მევენახეებმა ყურძნის რეალიზაციით 120 მლნ ლარზე მეტი უკვე მიიღეს. ყურძნის დღიური გადამუშავება 10 ათასი ტონის ფარგლებშია, რაც რთველის აქტიურ პროცესზე მიუთითებს. რთველი კახეთის თითქმის ყველა მუნიციპალიტეტში მიმდინარეობს, გარდა საგარეჯოსი, რომელიც მოსავლის დაბინავების პროცესში მომავალი კვირიდან ჩაერთვება.
 
საქართველოს მთავრობის გადაწყვეტილებით, 2021 წლის რთველის მხარდასაჭერად, სუბსიდირების პროგრამა მოქმდებს. პროგრამის მიზანია, პანდემიით გამოწვეული ვითარება უარყოფითად არ აისახოს მევენახე ფერმერებზე და ღვინის მწარმოებლებზე, სრულად დაბინავდეს ყურძნის მოსავალი. 
 
რთველი 2021-ის ფარგლებში, სუბსიდიას მიიღებს ყველა ის კომპანია, რომელიც შეიძენს და გადაამუშავებს კახეთის რეგიონში მოწეულ არანაკლებ 100 ტონა რქაწითელის ან კახური მწვანის ჯიშის ყურძენს და 1 კგ ყურძენში მევენახეს არანაკლებ 0,90 ლარს გადაუხდის.
255