BUSINESS TIME

საინფორმაციო სააგენტო

ფაროსანას საწინააღმდეგო ღონისძიებები 36 მუნიციპალიტეტში ჩატარდა

სურსათის ეროვნული სააგენტოს ფაროსანასთან ბრძოლის საკოორდინაციო მართვის ცენტრმა ფაროსანას საწინააღმდეგო ღონისძიებები სამეგრელოს, აჭარის, გურიის, იმერეთის, რაჭა-ლეჩხუმის 36 მუნიციპალიტეტში ჩაატარა. ამის შესახებ საინფორმაციო სააგენტო BUSINESS TIME-ს სურსათის ეროვნული სააგენტოდან აცნობეს. 
 
 
მათივე ინფორმაციით,  სულ დამუშავდა 251 108 ჰექტრამდე ფართობი, მათ შორის: თერმული ნისლით - 167 320 ჰა, ცივი შესხურებით - 53 273 ჰა სიმინდის მასივი, 30 515 ჰა - სოფლისა და ტყის პერიმეტრი.
 
„ძირითადი ამოცანა, რომელიც განსაზღვრული იყო სახელმწიფო პროგრამით, რომ მინიმუმამდე დაგვეყვანა ფაროსანას მიერ გამოწვეული ზარალი და სასოფლო-სამეურნეო კულტურების დაზიანება, მიღწეულია. დასავლეთ საქართველოში ფართომასშტაბიანი ღონისძიებები განხორციელდა. გარემოზე ქიმიური პრეპარატების დატვირთვის შემცირების მიზნით, გამოყენებული იყო სპეციალური სადგურების ტექნოლოგია. თერმული ნისლით წამლობის პროცესში, სრულად იყო გათვალისწინებული ფუტკრის დაცვის წესები,“ - განაცხადა სურსათის ეროვნული სააგენტოს უფროსის მოადგილემ, ზურაბ ლიპარტიამ.
 
ფაროსანასთან ბრძოლის პროცესში ჩართული იყო 250-მდე ერთეული სპეციალიზებული ტექნიკა. მიმდინარე წელსაც, აქცენტი სპეციალური სადგურების ტექნოლოგიის გამოყენებაზე გაკეთდა. ღონისძიებები მეფუტკრე ფერმერებთან კოორდინირებულად შემუშავებული სქემით მიმდინარეობდა.
 
სადგურები ტყის პერიმეტრებზე, სოფლის შიდა გზებსა და საცხოვრებელი სახლების მიმდებარედ, ფუტკრის დაზიანების თავიდან აცილების მიზნით, არაყვავილოვან მცენარეებზე განთავსდა. სულ დამონტაჟდა 86 491 ფერომონი. მავნებლის გავრცელების კონტროლის მიზნით, მთელი ქვეყნის მასშტაბით მიმდინარეობდა მონიტორინგი (განთავსდა 6451 ფერომონიანი დამჭერი).
 
ღონისძიებები მოსახლეობის ინფორმირების და უსაფრთხოების წესების დაცვით ტარდებოდა. პროცესში, საკოორდინაციო მართვის ცენტრთან ერთად, ჩართული იყვნენ ადგილობრივი თვითმმართველობები.
 
 
ავტორი: მირანდა შურღაია
ელფოსტა: businesstime@medial.ge
133