საქსტატის აკვაკულტურის სექტორული ანგარიშის თანახმად, 2024 წელს საქართველოში ფერმის კართან 1 კგ თევზის ფასი საშუალოდ ₾12.75 იყო და სახეობების მიხედვით განსხვავდებოდა.
კერძოდ, საქსტატის ინფორმაციით, გასულ წელს ქვეყანაში ყველაზე ძვირი, ₾25.9 რუსული და ციმბირული ზუთხის სახეობა ღირდა. ამასთან, ანგარიშიდან ჩანს, რომ თევზის ეს სახეობა გასულ წელს, 2023-თან შედარებით, ₾4.8-ით გაძვირდა, თუმცა ფასი პიკს 2020-21 წლებში აღწევდა, როცა კილოგრამი რუსული და ციმბირული ზუთხი ₾27.6-ად ფასობდა.
საპირისპიროდ, თევზის სახეობა, რომელიც გასულ წელს ფერმის კართან ყველაზე იაფი ღირდა თეთრი და ჭრელი სქელშუბლა იყო, კილოგრამზე ₾6.2-ის ღირებულებით. თევზის ამ სახეობის ფასი 2023 წელთან შედარებით თითქმის უცვლელი დარჩა.
თევზის ფასები საქართველოში - 1 კგ/ფერმის კართან:
- თეთრი და ჭრელი სქელშუბლა - ₾6.2
- თეთრი ამური - ₾7.5
- კობრი და სარკისებური კობრი - ₾10.5
- ევროპული ლოქო - ₾12.4
- ცისარტყელა კალმახი - ₾14.0
- რუსული და ციმბირული ზუთხი - ₾25.9
