ჩვენ გვინდა მშვიდობა, ეს მშვიდობა არ შეიძლება, ნიშნავდეს უკრაინის კაპიტულაციას, – ამის შესახებ საფრანგეთის პრეზიდენტმა, ემანუელ მაკრონმა აშშ-ის პრეზიდენტ დონალდ ტრამპთან ერთობლივ პრესკონფერენციაზე განაცხადა.
„ჩვენ გვსურს მშვიდობა. ეს მშვიდობა არ შეიძლება, ნიშნავდეს უკრაინის კაპიტულაციას, ეს მშვიდობა არ შეიძლება, იყოს ცეცხლის შეწყვეტა გარანტიების გარეშე. ამ მშვიდობამ უნდა მოიცვას უკრაინის სუვერენიტეტის პირობები, რაც უკრაინას საშუალებას მისცემს, მოლაპარაკებები აწარმოოს ყველა მხარესთან იმ საკითხებზე, რომლებიც მას ეხება და რომელთა შესახებაც მხოლოდ მას შეუძლია ლეგიტიმურად მოლაპარაკება, მაგრამ ეს არის მშვიდობა, რომლისთვისაც ჩვენ უნდა ავიღოთ პასუხისმგებლობა, რათა შევინარჩუნოთ უსაფრთხოება და სტაბილურობა უკრაინისა და მთელი რეგიონისთვის გრძელვადიან პერსპექტივაში, და ჩვენთვის, ევროპელებისთვის, ეს არსებითი საკითხია“, – განაცხადა მაკრონმა.
ამასთან, მაკრონის თქმით, ევროპა მზადაა, შეასრულოს თავისი როლი უკრაინისთვის უსაფრთხოების გარანტიაში.
„მე ასევე ჩამოვედი აქ, ბატონო პრეზიდენტო, რათა გადმოგცეთ ძალიან მკაფიო გზავნილი ევროპული ვალდებულების შესახებ. ჩვენ ვალდებულნი ვართ ხანგრძლივი მშვიდობის მშენებლობაზე, ჩვენ, როგორც ევროპელები, ვალდებულნი ვართ, ჩავერთოთ ამ უსაფრთხოების გარანტიებში. გაცნობიერებული გვაქვს, რომ ევროპელებმა მეტი უნდა გააკეთონ ევროპული უსაფრთხოებისთვის, მისი თავდაცვისთვის და უსაფრთხოების ტვირთის უფრო სამართლიანი განაწილებისთვის, რომელსაც თქვენი ქვეყანა რამდენიმე წლის განმავლობაში ატარებდა“, – განაცხადა მაკრონმა.
საფრანგეთის პრეზიდენტის თქმით, აშშ-ს პრეზიდენტ დონალდ ტრამპთან მოლაპარაკებების შემდეგ, უკრაინაში მშვიდობისკენ მიმავალ გზას ხედავს.
„მინდა, გითხრათ, რამდენად დარწმუნებული ვარ პრეზიდენტ ტრამპთან ჩემი საუბრების შემდეგ, რომ არსებობს გზა. ჩვენ გავუზიარეთ ერთმანეთს ჩვენი რწმენა, ჩვენი მოთხოვნები. ვიცით, რამდენი სამუშაოა ჯერ კიდევ შესასრულებელი, ამიტომ მომავალ კვირებში ერთად წავიწევთ წინ და გვექნება შესაძლებლობა, როგორც ჩვენმა გუნდებმა, ასევე მე, ვნახოთ ერთმანეთი სხვადასხვა ფორმატში, რათა ეს მყარი, ხანგრძლივი მშვიდობა რეალობად ვაქციოთ უახლოეს მომავალში. მე ამის ძალიან დიდი იმედი მაქვს. როგორც კი იქნება მყარი, ხანგრძლივი, მოლაპარაკებული მშვიდობა, ხელმოწერილი უკრაინისა და რუსეთის მიერ, რომლის გარანტორებიც ჩვენ კოლექტიურად ვიქნებით, საფრანგეთი ბრიტანეთთან ერთად მუშაობდა ბოლო რამდენიმე კვირის განმავლობაში, რომ ეთქვათ „ჩვენ მზად ვართ, წვლილი შევიტანოთ“. ასე რომ, ჩვენ გვქონდა გეგმა, რომელიც განხილული იყო ჩვენს სხვადასხვა სამხედრო ერთეულებს შორის, რომ „ჩვენ მზად ვართ, არა იმისთვის, რომ წავიდეთ ფრონტის ხაზზე, არამედ ვაჩვენოთ ჩვენი მხარდაჭერა, რათა დარწმუნებული ვიყოთ, რომ მშვიდობა, რომელიც მოლაპარაკებული და ხელმოწერილია ორივე მხარის მიერ, შენარჩუნებულია“. ასე რომ, ეს არის სრულიად მშვიდობიანი მისიები, არა საბრძოლო, მაგრამ ისინი არის ძლიერი განლაგებები, რომლებიც მოქმედებენ, როგორც გარანტიები. ეს არის სოლიდარობის ნიშანი. ეს ასევე ეხება ევროპულ უსაფრთხოებას და ეს არის ის, რასაც მე ვამბობ კვირების განმავლობაში. თუ ჩვენ არ უზრუნველვყოფთ ამ ტერიტორიის უსაფრთხოებას, რომელიც ევროპის ნაწილია, როგორ უზრუნველვყოფთ ჩვენს საკუთარ უსაფრთხოებას? ჩვენ, ფრანგები, ვცხოვრობთ 1 500 კილომეტრის დაშორებით უკრაინიდან. და რა თქმა უნდა, ეს კიდევ უფრო ახლოა, თუ პოლონელი ან გერმანელი ხარ. ასე რომ, ეს არის ჩვენი ვალდებულება კოლექტიური უსაფრთხოების მიმართ და გარკვეული აზრით, ეს არის პასუხი მოწოდებაზე, რომლითაც ჩვენ მოგვმართეს: „თქვენ, ევროპელები, მეტად უნდა იყოთ ჩართულები, მაგრამ ჩვენ, ამერიკელები, გვერდში გიდგავართ“. ჩვენ ამას ვაკეთებთ უკრაინაში, მაგრამ ჩვენ ასევე უნდა გავაკეთოთ ეს ჩვენი კოლექტიური უსაფრთხოებისთვის“, – განაცხადა მაკრონმა.
