საქსტატის წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2023 წელს 1,594 მლრდ დოლარი შეადგინა, რაც 24 პროცენტით ნაკლებია 2022 წლის დაზუსტებულ მაჩვენებელზე. უწყების ინფორმაციით, შემცირების გამომწვევ უმთავრეს მიზეზს წარმოადგენს სავალო ვალდებულებების შემცირება.
რაც შეეხება პირდაპირი უცხოური ინვესტიციების განაწილებას კომპონენტების მიხედვით,სააქციო კაპიტალის მოცულობამ 1,173.1 მლრდ დოლარი შეადგინა, რაც წინა წლის დაზუსტებულ მაჩვენებელს 68.3 პროცენტით აღემატება, ხოლო რეინვესტიციამ 1,279 მლრდ დოლარი შეადგინა, რაც წინა წლის დაზუსტებულ მაჩვენებელზე 7.2 პროცენტით ნაკლებია. სავალო ვალდებულებები კი 857.5 მლნ დოლარით შემცირდა.
ამასთან, საქსტატის მონაცემებით, 2023 წელს საქართველოში განხორციელებული პირდაპირი უცხოური ინვესტიციების მიხედვით უმსხვილესი ინვესტორ ქვეყნად კვლავ გაერთიანებული სამეფო რჩება, საიდანაც შარშან განხორციელებულმა ინვესტიციებმა 392 მლნ დოლარი შეადგინა. მეორე ადგილზეა - ნიდერლანდები - 360.5 მლნ დოლარით, სამეულშია თურქეთი - 168.8 მლნ დოლარით.
რაც შეეხება ეკონომიკის სექტორებს, სამი უმსხვილესი სექტორის წილმა (განხორციელებული პირდაპირი უცხოური ინვესტიციების მიხედვით) 2023 წელს 66.5 პროცენტი შეადგინა. ყველაზე დიდი მოცულობის პირდაპირი უცხოური ინვესტიცია საფინანსო და სადაზღვევო საქმიანობების სექტორში განხორციელდა და 630.1 მლნ აშშ დოლარი შეადგინა, რაც მთლიანი პირდაპირი უცხოური ინვესტიციების 39.5 პროცენტია. მეორე ადგილზე იმყოფება დამამუშავებელი მრეწველობის სექტორი 291.7 მლნ აშშ დოლარით (18.3პროცენტი), ხოლო მესამეზე - ტრანსპორტის სექტორი 138.2 მლნ აშშ დოლარით (8.7 პროცენტი) - აღნიშნულია საქსტატის ინფორმაციაში.
