რუსეთის პრეზიდენტმა, ვლადიმერ პუტინმა იმედი გამოთქვა, რომ უკრაინაში ბირთვული იარაღის გამოყენების საჭიროება არ იქნება. ვლადიმერ პუტინის თქმით, რუსეთს ახლა აქვს საკმარისი ძალა და რესურსები უკრაინაში ომის ლოგიკურ დასასრულამდე მისაყვანად.
„მათ სურდათ ჩვენი პროვოცირება, როგორც თქვენ თვითონ თქვით, მათ სურდათ, რომ ჩვენ შეცდომები დაგვეშვა. არ იყო საჭირო იმ იარაღის გამოყენება, რომელზეც თქვენ ისაუბრეთ და იმედი მაქვს, რომ საჭირო არც იქნება. ჩვენ გვაქვს საკმარისი ძალა და საშუალებები, რომ 2022 წელს დაწყებული საქმე ლოგიკურ დასასრულამდე მივიყვანოთ იმ შედეგით, რომელიც რუსეთს სჭირდება“, – ასე უპასუხა პუტინმა ჟურნალისტის კითხვას, არსებობს თუ არა უკრაინაში ბირთვული ესკალაციის საფრთხე.
ამასთან, როგორც პუტინმა განაცხადა, რუსეთი არ აპირებდა ომის დაწყებას. მისივე თქმით, რუსეთი გულწრფელად ცდილობდა, მშვიდობიანად მოეგვარებინა ოკუპირებული დონბასის საკითხი.
„ჩვენ არ შეგვეძლო, არ დაგვეჯერებინა და არ შეგვეძლო რაიმე მკვეთრ მოქმედებებზე გადასვლა, შესაბამისი სამუშაოების ჩატარების გარეშე უსაფრთხოების სფეროში, შეიარაღებული ძალების სფეროში და ეკონომიკისა და ფინანსების სფეროში. მაგრამ ჩვენ სპეციალურად არ ვემზადებოდით ამისთვის. ჩვენ გულწრფელად ვცდილობდით დონბასის პრობლემის მშვიდობიანი გზებით გადაწყვეტას. აღმოჩნდა, რომ მეორე მხარე ფიქრობდა და მოქმედებდა სხვაგვარად“, – აღნიშნა პუტინმა.
